講到陪月,實在聽過太多恐佈嘅故事。例如叫你買過哂D嘢、搬弄是非、點老公/工人姐姐自己就乜都唔做、偷藥材、刮花哂你D LC煲、洗爛哂D衫、用凍水同B沖涼、餵B食酸咗嘅人奶、唔理個B自己瞓覺、擺阿B喺梳化後拂袖而去、拮大哂全部奶嘴、一日餸買成千蚊、畀產婦食急凍肉、一日三餐non stop肉餅同白烚菜,聽過最過分的,係個陪月唔理產婦嘅健康亂煮嘢,導致該名產婦入院。

香港暫時沒有法例管制陪月行業,只要你去上個course考個試,就可以做陪月。24小時陪月月薪可高達4-6萬,遇到經驗豐富的當然係好事,但亦有些心術不正的人混水摸魚,聲稱自己如何有經驗和有愛心,實情係黑心陪月,hea住賺你一筆,實在是害人不淺。錢無咗就算,最慘的是媽媽補唔好搞壞身體又或是讓BB受傷,嚴重的甚至引發產後抑鬱症。當然好的陪月亦大有人在,但陪月就如男人樣,衰嘅出面大把,好嘅就睇你遇唔遇到。身邊的朋友大多數都已為人母,基本上有一部分人都有過不好的經驗,中伏率奇高!可想而知要遇到一個稱職的陪月有多難。

由於我先生在台北工作,所以在生產前苦思了良久要在哪裡生產。我首選當然是香港,但考慮到爸爸可能一整月也看不到BB的關係(佢唔得閒飛來飛去),所以最後選擇在台北生產。

台灣人個個去月子中心,雖然亦有陪月,佢地稱為「月嫂」or「到府坐月子」,但並不普遍。當地月子中心成行成市,有平有貴,最平的套房約150呎包伙食,貴的則可去到五星級水準,由260呎到700呎不等(台北市以外地區可能更大)。我好幸運,先生非常錫我,肯送我去五星級月子中心,聞說侯佩岑、劉若英和范瑋琪(范范)亦在此坐月。

月子中心係點同有幾正呢?Well, 先講媽媽先:

1)房間配套:

Kings Sizes床,書枱,餐桌,衣櫃,電話,電視,雪櫃,奶樽消毒器等,VIP房甚至有按摩椅及按摩池!洗手間內有提供毛巾,配備方面有浴室寶,Rain Shower (爸爸用),免治馬桶。每日有清潔嬸嬸嚟打掃,超快手而且很乾淨。中心每日提供2件哺乳衣供媽媽使用,另有手術室用嘅笠衫,如爸爸著出街衫可著笠衫先抱BB,確保衛生。中心另有提供厚身長袍,方便媽媽在房間以外活動。

 

 

 

 

 

 

 

2)饍食:

生完最緊要進補,所以飲食係超級重要!中心會問你有咩唔食,如產婦係素食者,中心亦可為其另做素菜餐。中心一日提供6餐,早餐–點心–午餐–下午茶–晩餐–宵夜,另供應3-5壺不同口味及功效的養生茶。中心自設廚房,確保食物新鮮。(之前有睇過D月子中心冇廚房,餐飲都係外面送嚟,即刻不用考慮因為D飯餸凍咗再叮對身體唔好)。早上七時左右開始送餐,早餐多數係台式麵線、包點、粥品等,但間中亦有西式早餐如waffles及三文治,一定唔會悶。點心通常係不同款式的堅果飲品又或是豆漿,再配新鮮水果。午餐一定有湯有飯有菜有肉,三餸一湯。下午茶係甜品,如木瓜糖水及台式甜湯等。另外一個禮拜差不多有成四日都有免費糕點或油飯,因為台灣人彌月係送呢D畀親友(薑醋係廣東人習俗),為sell彌月禮品,所以有好多店鋪會送免費試食裝畀家長品嚐。晚餐一樣係三餸一湯,而宵夜就係燉湯。中心有請執業營養師設計結合中西醫學嘅餐單,味道清淡但好好食!用料好健康而且for上奶,如蒸魚,雞肉及炒肉片等,菜式種類勁多,我住咗時多日都鮮有repeat. 燉湯每日不同,一日有3盅,有齊魚湯,豬骨湯及雞湯,唯一不慣係台灣人D湯好油,我通常去咗油先飲。另外一樣非常奇怪嘅就係餸菜好多雞蛋,但我發現台灣人冇話手術後不能食蛋呢回事。我嘅醫院餐已有雞蛋,問營養師,她回答有豐富蛋白質應該多吃,到月子中心又有蛋,問staff亦係同一答案,並稱從來沒有人對蛋有疑問。我的院友們無論開刀順產都一樣食蛋,所以我生完一個禮拜後都照食,end up傷口都冇問題,so I guess術後戒蛋應該係香港人習慣。

3)中心設施:

中心係喺鬧市中的一棟樓,約有九層。房咭似酒店咁只能去自己的樓層,即是有高度私隱,而一楝樓的形式亦代表不會有閒雜人等(有D中心喺辦公大樓,會有不同人出出入入)。中心有大堂,嬰兒室,spa, 媽媽教室,及自家廚房。Spa是自費,普通洗頭、薑水洗頭等各式其式,價錢由$100-600港幣不等。中心亦有facial,同樣都係自費,但我冇試過。中心會請專人講座及教班,基本上乜topic都有,由母嬰健康、減肥需知、孕婦yoga、baby yoga到風水命理(BB姓名學)等等都一應俱全,課程方面則全部免費。另外BB快滿月時中心會包一次baby swimming. 地點在嬰兒室内的BB池,護士會在旁陪伴BB,呢個時候父母則負責喪影相及拍片。(以下圖片來自英倫產後護理之家官網)

4)醫療團隊:

每日都會有註冊護士為媽媽量血壓,follow up排惡露情況,check傷口 or 洗傷口。另每星期都有婦科醫生及兒科醫生為每個媽媽及BB睇症及檢查,確保全人類健康。

5)中心規條:

房間除產婦及B外,可以有一名陪伴者入住,此人多數都係先生。有D中心冇話限制咩人出入,但我果間就好strict。除父母及醫護人員外,其他人一律不准掂B,爺爺嫲嫲公公婆婆一樣唔畀抱B!要探就只能隔住玻璃望。呢招勁正,你知啦,有D老爺奶奶/姨媽姑姐話要探你or爭住抱B,有時產婦可能唔想,呢個時候月子中心就幫你擋晒所有熱情嘅親友⋯讓產婦得到充分休息,亦make sure BB唔會接觸親友可能會帶來的細菌,正正正!另外,房間除b父母及醫護人員外只限爺爺嫲嫲公公婆婆可進入,並嚴禁「老人與B」同房,如老人家在房間,B則要留在嬰兒室,如B在房間,老人家就要在lobby, 確保BB的衛生安全。至於朋友方面,就只能在指定時間到lobby探產婦,一律不准上房。

產婦可隨時離開中心,只要登記同staff/nurse講聲就ok, 但當然冇必要就唔好學人去吹吹風啦!

講完媽媽,咁BB方面又點呢?

1)嬰兒室

中心提供BB衣物並代為洗滌及消毒,另包BB尿片及清潔用品,如需要奶粉則需自備。

中心有大量專業的護士,嬰兒室每日消毒一次並24小時提供服務,護士包哂所有湊B事項如餵奶掃風、換片沖涼、洗奶樽等等。中心鼓勵母嬰同房,你call護士,就有人送阿B上嚟。如果媽咪要休息,送返BB畀護士照顧即可。即是話,媽咪在這一個月𥚃可晚晚瞓天光,yes,係晚·晚•瞓·天·光!中心完全沒有生手護士,每個都備有執業資格,堅係湊B高手,專業到爆炸又有耐性,媽咪有咩搞唔掂,可隨時call護士上房幫忙。護士會教媽咪如何埋身,教沖涼,教換片⋯連泵奶器都有提供,仲要有幾隻牌子任揀。護士會幫BB記錄奶量,排泄次數及量體重,每日keep track, 確保BB健康。我初為人母當然係「呢咁hea」,有時真係白痴到懷疑自己是否有資格做人阿媽,但護士基本上都好有耐心咁解答我嘅低B疑問,有時仲要心理輔導埋我,真係好感動⋯所以中心內的產婦都好放心,因為個醫療團隊全部都堅係有醫院經驗,唔係話陪月亂吹自己湊過幾多個B做咗幾多年嗰隻,媽咪最care的莫過於BB得到妥善嘅照顧,所以我晚晚都好好瞓!講緊嘅係一覺瞓到十一二點,真係諗起都覺得自己過分。

香港同台灣嘅坐月文化與習慣其實好唔同,例如我全程冇用過薑水洗手同沖涼(呢度唔興),香港的坐月餐有好多嘢都話唔食得,但見台灣月子中心就有好多不同食材,有D食材仲可能會畀香港人話涼or 燥or發傷囗or whatever,但我食足成個月,院友又咁食,又有醫生check住,個個都好健康冇事喎。以前我成日手腳冰冷,瞓覺標冷汗,但坐完月後冇再標冷汗,感覺個人暖咗好多,面色紅潤,黑眼圈都淡埋!所以我相信我補得好徹底;)喂咁正咁可唔可以住多幾個月呀?答案係Nope, 最多45日。

至於大家最關心嘅價錢⋯有成條專業醫療team 24小時去照顧產婦同BB,包五星房包伙食,到底要幾錢呢? Well, 收費depends on 房間嘅大小,入住25日約港幣六萬至十幾萬不等。以356呎(台灣單位為10坪)的房間為例, 一日定價為$2625HKD, 入住25日以上則每日減至$2231. 498.4呎(14坪)原價$3500, 25日以上為$2975. 至於最大的尊爵套房, 面積約640.8呎(18坪), 每日收費$4500, 25日以上則減至$3825. 我個人認為成件事抵到癲咗,因為單單係請一個專業看護都唔嘢少,何況係成條team?! (而且請24陪月都要四萬幾啦,仲未計伙食喎)除非你係大富人家啦,否則喺香港好難有如此高水準嘅服務!

有人話點解HK冇月子中心?好想住呀救命!曾經有朋友話:「我識人有幾千萬cash,叫佢開間先!」但據台灣報導講,我住嘅月子中心(共有兩間)係由大集團共砸下4億元港幣建成,所以⋯唔係話開就開到㗎。加上香港邊有地喎?!除非四叔誠哥大劉嗰D肯玩啦,如果唔係,都幾難實現啦。

英倫產後護理之家 (大安館)

台北市大安區基隆路二段230號