結婚紀念日,當然要同老公去浪漫一吓啦。平時雖然成日都會出街食飯,但多數會喺屋企附近嘅餐廳,隨便食啲嘢就算,所以好少會留意邊到有好味,又有靚環境嘅餐廳。

平時所有節日都係老公負責訂位食飯,今次希望比返啲驚喜佢,所以上網搵咗一吓資料,比我發現咗佐敦有一間幾有情調嘅餐廳 Flâneur,歐陸式嘅裝潢,仲有一個開放式露天窗口位置,好啱影相呃吓Like!

門口位置已經放咗一個餐牌,食物方面主要以西餐為主。望一望啲價錢都幾抵食,最貴都係3百幾蚊就有一份肉眼扒喇!

先嚟個頭盆,叫咗一份餐前小食「韓式醬燒千層肉」(HK$32/兩串),豬肉好軟身,又好嫩滑,加埋啲醬汁,味道香濃。

珍寶大頭蝦海鮮意大利麵(HK$228),完全係因為有大頭蝦嘅關係先會點。賣相幾靚,海鮮方面有青口、蜆肉、大頭蝦同帶子,都幾鮮甜。

意大利麵方面嘅份量就偏少,兩個人食唔多夠喉,不過味道好正,好彈牙!

烤美國豬背骨(HK$98/半份),呢個我見好多人都有點,所以見都幾平就點咗半份試吓。側邊仲有燒粟米伴碟,非常有誠意。

豬背骨切開有四件,我想講係勁軟熟,一切就會骨肉分離,一啲都唔韌。味道方面有少少甜甜哋,都幾開胃架!

慢烤德國咸豬手(HK$88/半份),我老公係豬手迷,去到邊,有豬手一定會點一份。不過驚太多嘢食唔曬,最後只係點咗半份。我老公勁讚好味,肉質好嫩滑,味道啱啱好,唔會太咸,下次佢話一定會再食呢個!

埋單,差唔多$600,我覺得真係好抵食囉!so far 環境同食物都唔錯,重點係服務員好細心,會不停幫客人添水,好自動波,抵讚!

Flâneur (佐敦)

地址:佐敦官涌街5號地舖

訂座電話: 3956 9601