18

「認識多一種語言, 認識多一個世界。」

呢句說話我早幾年喺Facebook見到, 一直都覺得好有意思, 當時亦推動咗我去學日文, 雖然我永久停留喺錯談日語嘅程度, 但識多咗日文字, 又搭到兩咀, 去親日本旅行都爽好多, 遇到嘅日本人亦都分享咗更加多, 真心體會到共同語言嘅重要性。

喺希臘頭一個月, 只係靠英文同埋身體語言去溝通, 當然日常生活無咩問題, 但係唔係個個希臘人都識英文(旅遊區除外), 有時大家你眼望我眼, 除咗傻笑之外真係唔知仲可以點。

琴日我終於開始學希臘文, 之前去咗睇”Arrival”, 想同外星人溝通都要由基本字母學起, 所以第一堂就由呢24個基本字母開始(我覺得啲字母其實同外星文無咩分別), 除咗發音難之外, 最正嘅係好多同英文字母好相似嘅字母其實完全係另一件事, 好易混淆, 好似:

η = i / ee
ν = n
ρ = r
υ = i / y

睇唔明? 唔緊要, 因為我都好多疑惑, 希臘人已經教到噴血, 但呢個只係開始, 遇著我呢啲問題學生佢有排捱。

我仲學咗點併我個希臘名, 就係Τιφφανυ, 希望可以快啲學多啲字同埋文法, 可以了解多啲希臘嘅文化, 認識多一個世界。